“La ‘janna a lianti“ è un prugghjettu fotograficu chi nasci culla mira di indalgà e mustrà a l’alti, chi la struttura di lu Stazzu ( e saria a di: li casi e li so’ tarreni ) è una entitai soziali/eccunomica di la sozietai di la campagna Gadduresa; e chistu finza a’ la primma mitai di lu 1960. Ma è cosa cumpresa, parò chi ancora ogghj in dì, restia un elementu di originalitai e interessanti, ancora siddu, li più, hani paldutu la funzioni pa la cali erani stati fatti.
Una selezioni di magghjni a culori e biancu/nieddu, risumi li lochi e la ‘ista in tundu di chisti entitai e di l’omu chi vi stagghja, cussì comu s’è ussilvatu.
Illu cilcà, candu si so’ fatti li fotogafii, si so ‘isitati più di duicentu Stazzi di tutta la Gaddura. In un sigundu mumentu, dapoi, si so sciuarati guasi sessanta Stazzi, a ghjettu tra iddi e in cussoghj diessi: da li marini a chissi posti ill’alturi; alti ill’azza di li paesi e alti ancora in cussoghj isulati.
Chistu pa cilcà di punì a paru una “ista” cumprita cun tutti li diffarenzi di li lochi undi so stati collocati. Diffarenzi chi no so abbeddu ma chi si notani illa posta a paru di li casi, ill’architettura e più di tuttu illi variazioni a sigundu di l’usu diessu chi ogghj sinni faci.
E’ un contu, pa magghjni, chi fiùra la campagna e li cussoghj gadduresi; l’umanitai chi ancora ogghj vi trabadda e vi staci. O puru li chi n’hani una calche pulzioni e vi passani; o chiddhi ancora chi s’hani acconciu li casi pa vinèssinni a istragnà.
S’è indalgatu innantu a cantu e comu la “globalizzazioni” agghja variatu la ista di li lochi. Lu sestu archtettonicu di li casi, l’economia e la socialitai di la Gaddura; e ghjà si sa chi di la Saldigna, è la palti undi è accudita più ghjenti di fora. Eppuru manteni ancora e risisti cun umbè d’elementi di la tradizioni; maccari a volti un pocu “museificati” o turrati a punì a paru ma chi, in dugna manera, hani turratu a haè una noa vitalitai.

Fotografà ogghj chistu cuntestu vo dì cugnilà lu “status quo” cilchendi li signi chi avvanzani da un passatu di pocu tempu chi guasi no s’avvelti ma chi c’è eccomu ! Vo di’ punì a paru li pezzi d’un cunnottu ‘iu; fossi pa pocu ancora. Vo dì indalgà chisti pochi signi ch’avvanzani ma illu matessi tempu scarragghjà ignitti un pocu dubicosi, innantu a li cali, podarà smannassi lu ‘enidori di chisti comunitai e di chisti cussoghj.
Fotografà ogghj la rialtai di lu Stazzu e comu tintà di bucanni la siti di cunnotti e mimorii chi so accultu umbè ma chi ci so capulendi; attualitai debbuli chi cambigghjani dì pa dì; e di cumprindì chistu ‘enidori ch’è ghjà alla ‘janna.

 
“La ‘janna” L’Intrata di lu stazzu, nascia sempri i lu fronti di la casa postu a occhj a soli  (tra lianti e mezzudì); era cussì  galdata da li ‘enti folti di punenti e maistrali.

Li fotografii di “ La ‘janna a Lianti” so stati posti a paru in un annu di “ripresi” ( 2010/2011) cun un trabaddu a miria pa haè un “corpus immagini” di manna galitai artistica e documentaria, fattu pa lu Centru Regionali di lu Catalogo finanziatu dalla Regione Autònoma de Sardigna e pultatu a dananzi dall’I.S.R.E. (Istituto Superiore Regionale Etnografico della Sardegna ).